Меню


Хабарарин категорияр
Хабарар [34]


Хабарарин календарь
«  куьлегь (Октябрь) 2009  »
ПнВтСрЧтПтСбВс
   1234
567891011
12131415161718
19202122232425
262728293031


Форма входа


Жагъурун


Дустар


Чи силис
Дустуниз гвере куьн квелай алатиз гьазур я?
Всего ответов: 505


· RSS29.03.2024, 03:03
КIвал » 2009 » куьлегь (Октябрь) » 7 » Шарвилидин неве - зурба архитектор
Шарвилидин неве - зурба архитектор
09:05
Бажарагълу архитектор Гьа-жимурад Таирович Шугае-вахъ галаз чун Ахцегьа “Шарвили” эпосдин 10 йисан юбилейдин сувариз гуьруьшмиш хьана. Пара агъайна, умун къилихрин ам Бакуда, Махачкъалада, Москвада ва гзаф маса шегьерра хкажнавай зурба дараматрин проектрин автор, Халкьарин архитектурадин Академиядин профессор я. “АцIанвай къуьлуьн кьилер агъуз жеда” лугьурвал, кIусни дамах гвачир, хайи Ватанда кьиле тухузвай “Шарвили” эпосдин межлисда иштиракдай, мукьва-кьилийрални мектебдин дустарал кьил чIугвадай мумкинвал хьуникайни пара разивилелди рахазвай ам. “Къагьриман пагьливандикай бадеди заз, гьакъикъатда хьайи касдикай хьиз, риваятарни махар ахъайдай, “КIелез хивяй шим рахаза, чан Шарвили дидезин. ВацIун кIаняй пул рахаза, чан Шарвили, дидезин”, - ада лугьур халкьдин манийрин ван, гуя исятдани зи япара ава… эпос-эсер авайди тестикь хьанва. И кардал шадвал ва дамах авуналди, за чи эпосдиз талукь яз ва ам вири дуьньядиз машгьур авунин ният аваз чIехи комплексдин проект туькIуьрнава. Халкьдин къажгъан муркIадални ргада лугьуда кьван, хайи халкь патал жувалай алакьдай вири месэлайрик кьил кутаз зун гьазур я”, - лагьанай ада.

Ери-бине Ахцегьай тир Шугаев Гьажимурад Таирович 1940-йисан 2-майдиз Бакуда интеллигентдин хизанда дидедиз хьана. 1957-йисуз Ахцегьрин I-нумрадин юкьван чирвилерин мектеб “вадралди” куьтягьайдалай кьулухъ ам, гъвечIи чIавалай техникадизни художниквилиз майилвал авай ва гъиле кьур квев хьайитIани яратмишунрин тегьерда эгечIдай зигьинлу жегьил, муаллимрин теклифдалди Ахцегь райондин Пионеррин кIвале кIвалахал тайинарзава. Гележегдин архитекторвилин лишанар гьеле гьа чIавалай кьатIузвай жеди.

1961-йисуз Гьажимурад Советрин Армиядин жергейриз фена. Армиядай хтай I964-йисуз ам пешекарвилин яратмишунрин эцигунрин гьар жуьре проектар туькIуьрунал ва абур кьилиз акъудунал машгъул жезва.1968-йисуз ам Азербайжандин политехнический институтдин архитектурный факультетдик экечIна. Гьа са вахтунда СССР-дин “Гипроторгдин” Азербайжандин филиалда техник-архитекторвилин везифаяр тамамариз, ада гележегда Азербайжанда ва СССР-дин стхавилин маса республикайра хкажай са жерге дараматрин проектар туькIуьрна: Бакуда гьуьлуьн къерехдив гвай бульварда “Сихил”, Ж.Жабарлы куьчеда “Ченлибель”, гьакI Гёкгель вирел ресторанар, Саранскда (Мордовия) универмаг, Ставрополда ВДНХ-дин комплекс ва пара масабур.

1973-йисуз институт агалкьунралди акьалтIарна, илимдинни архитектурадин “Гипроторг”, “Азкоммунпроект” институтра, меркездин Насимидин тIварунихъ галай районда проектринни сметайрин бюродин начальниквиле, гьа районда кьилин архитекторвиле ва Баку шегьер безетмишунин управленидин начальниквиле гьакъисагъвилелди кIвалахзавай адан йисар иллаки бегьерлубур хьана. Лезги архитектордин яратмишунрин кIвалахриз- Бакуда гьуьлуьн патав эцигай ВДНХ-дин комплексдиз, Вьетнамдин Вунгтау шегьердин мугьманханадиз, Ленкоранда Ази Аслановаз, Маштагъа посёлокда Мамедьяроваз хкажай памятникрин проектриз … гьукуматди чIехи къимет гана.

Архитектордин бажарагъдин бегьерар тир “Арка-банкдинни”, “Азеригазбанкадин”, “Каспиан”, “Бабиль” офисрин дараматар, Исламдин медениятдин центр “Иршад”, гзаф мертебайрин яшайишдин кIвалер ва адан пара маса эцигунар алай аямдин Бакудин архитектурадив иллаки хъсандиз кьазва.

1990-йисуз хизандин гьалар себеб яз Гьажимурад Таирович Дагъустандиз ва 2001-йисуз РФ-дин архитектурадин Советдин халкьарин Ассоциациядин теклифдалди хизанни галаз Москвадиз хквезва. 2006-йисалди ана адал яратмишунринни информациядин месэлайрай секретарвилин, гьакIни “Архитектура, Строительство, Дизайн” журналдин кьилин редакторвилин жавабдар везифаяр ихтибарзава. Алай вахтунда Гь.Т.Шугаев Москвада “Мемар” ООО-дин проектринни эцигунрин фирмадин кьилин архитектор я.

Къейдин, яратмишунрин зегьметдин девирда Гьажимурада 300-лай артух проектар тамамаруналди, 40-далай виниз гьайбатлу гьар жуьредин дараматар хкажуналди, ам неинки Азербайжандани Россияда, гьакI вичин эцигунрин бажарагъдин зурба гелер тунвай Туьркияда, Вьетнамда, Иранда, Люксенбургдани машгьур ва сейли я. Алава яз, адалай уьлкведин общественный уьмуьрдани, яратмишунрин Союздин кIвалахдани активнидаказ иштиракиз алакьунал парабур тажуб я. Виридуьньядин архитекторрин Союздин конгрессрани, МСА-дин 11 региондин уьлквейрин конференцийрани (Брюселда, Пекинда, Женевада, Берлинда, Иерусалимда, Афинида, Бухарестда, Астанада) ва яратмишунин кIвалахрин гьар жуьре маса серенжемрани активдаказ иштиракиз, вири дуьньядилай цIар илитIзава.

Эхь, Азербайжандин, Россиядин ва Виридуьньядин архитектурадин искусство вилик тухунин агалкьунра Гь.Т.Шугаеван яратмишунрин намуслу карда зегьмет лайихлудаказ къейднава. Ингье а зегьметдин бязи мертебаяр - ам Азербайжандин архитекторрин Союздин Правленидин ва Президиумдин член, РагъэкъечIдай патан уьлквейрин архитектурадин Академиядин гьакъикъи член-корреспондент, Азербайжандин лайихлу архитектор, Москвадин архитекторрин Союздин член, халкьарин архитектурадин Академиядин профессор, Къазахстандин архитекторрин Союздин член я.

2009-йисуз адакай Россиядин архитектурадинни илимдин Академиядин меслятчини хьанва…

ГьакI лап хъсан проектринни эцигунрин международный са жерге конкурсринни килигунрин лауреат ва дипломант тир чи ватандашдин баркаллувилин зегьметдин дережаяр къуй мадни хкаж хьурай! Чи мурад адаз чандин мягькем сагъвал ва архитектурадин алемда мадни еке агалкьунар хьун я.

Инал чна куь фикирдиз архитектордин акьул-камалдинни гъилин бегьерар тир бязи яратмишунар гъизва.

 
авторы:Д.ШЕРИФАЛИЕВ,  "Лезги газет"
Просмотров: 1214 | Добавил: lezgiland | Рейтинг: 5.0/1 |