Зи хиялар физва яргъаз, аквазва заз Лезги чил!
Вили Каспи, кьакьан синер, рехи жезвай цlвелер Ви!
Вун гьинава, зи кlаниди, вил хьанва зи пара вахъ!
Це заз жаваб, жемир яргъа, датlана вил ала Вал!

Дарих тир зун, яргъи йифди ахвар хьанач заз,
Ви къаматди, Ви шикилди кьарай ганач заз.
Ифей пlузар зурзазавай Ви тlвар кьадайла,
Чlулав вилер кьежизавай на гьай талгьайла.
Мад са залум йиф алатна Вун рикlе аваз,
Экуьн гарун къужахдава зун куьцуьган гваз.

 

 

 

Зун булах я суван хуьруьн
Ваз хуьз гьамгад къайивал.
Багъишда за Ваз хуш хъуьруьн,
Тийиз ерли зайивал.

Тар жеда зун. Ваз багъишда
Зи пешери серинвал.
Шадвилелди бамишарда
Ви рикlе авай киринвал.

Гар жеда зун. Вал элкъведа,
Туьмерда Ви мекериз.
Ви дакlардив за йиф хуьда,
Ви ахвариз кинериз.

Булут хьана хкаж жеда
Зун ракъинин къаршидиз.
Чимивилик акаж хьана
Серин гуда Ви уьлчуьдиз.

Гъед жеда зун йифен цавал,
Эвичlда Ви балхундик.
Чир жедатlа Ваз элкъвейди вал,
Ви ахвар хуьз юргъундиз?

Пакам кьиляй яр-лаз хьана,
Мад хъфида чилиз зун.
Авахьда шад аваз хьана,
Муьгьуьббатдин гьуьлуьз зун.

Вири жеда са Вун патал,
Ваз багъишда къулайвал.
Вакай къвезва зи гьар са чlал,
Зи вил даим ала Вал!  

 

 

Зи вилерай авахьзава мад уьчlуь накъвар
Вучиз ятlан кьазвач Вуна мад ва мад зи тlвар,
Жаваб гузвач зи мецелай къвезвай чlалариз
Килигзавач гьич Вуна зун вахъ къекъвезвай рекьериз.

Ачухнавай Джумарт за Ваз зи рикlин ракlар.
Кваз такьурла михьи гьиссер хьана заз кьагьар.
Бес тушни хас кьетlивал жегьил лезгидиз,
Муьтlуьгъ жерид тушни Ви рикl рушан гьиссериз?

Гьикl хьайтlани за вилив хуьда Вун – умуд атlудач!
Югъди-йифди Ви тlвар кьада, зун галат жедач!
Гьар юкъуз къвез Волга вацlуз ахъайда за сирер,
Гьуьл ацlана, лепе хьана гудайвал Ваз туьмер!

 

 

Ви вилик за хъийидач мад усалвал,
Я Ви салам, я Ви калам герек туш.
Зи рикl мурун туш са ахьтин кьегьалвал,
Чир хьухь гила, чун сад-садан дирек туш.

За азадвал Ви лукlвилихъ дегишдач,
Ви гьиллейри ийизмач зун чlалахъар.
Жуван йисар рагъул яд хьиз экъичдач,
Масакlа я гила вири кlвалахар.

За яргъалди гуьзетна Ви кьегьалвал,
Вири гадриз, са Ви рекъин хел хвена.
Гьа кар хьана за авур са усалвал
Ваз – кlанивал, амайбуруз хъел хвена.

Гьа-гьа йикъар бада фейди гила заз
Ачух хьана. Гатазва зун туьгьметри.
Яб ганач за, анжах гила чида заз,
Хуьз тежерди кlанивал са минетрив.

Анжах чидач, гьакl алдахар ийизвай,
Вибур вири тапан кьинер жедайди.
Заз акl тир хьи, Вунни зун хьиз ифизвай,
Чир хьанач заз цlай руьхъведи недайди.

Алад, кlан хьухь масад. Гьада белки Вун
Залай гзаф шадарда, туш, тешвигьда,
Завай жезмач жув мад алдатмиш авун,
Жезмач завай янух лукlраз тешпигьди.

Зун мад шедач. Хъуьреда гьар гьалтайдаз,
Алдатмишда жувни ва гьакl вирибур.
Алахьай югъ лугьуда пис гьалчlайдаз
Къалурда за кlан хьайид хьиз гьейрибур.

Мегер гьакьван усал жедан кlанивал?
Гьакьван фад-фад ийиз жедан дегишар?
Вун хьиз садни кlан хъижеч заз, бейниван
Тикрар жедач заз Вун акур уьруьшар.

Ви бедлемвал течиз, за Ваз багъишна
Рикlин вири земземарни зегьемар.
Ваз чир хьанач зи къадир, зун бамишна,
Гила зазни герек туш Ви зуькемар!

 

 

Зи кlаниди! За тlвар такьур садрани,
Вун паталди хуьда жуван вафа за.
Вун галайла, къуватлу жез къадрани,
Къачуда и дуьньядивай сафа за.

Заз ви лувак кlанзава жув акуна,
Вун галайла вири рекьер куьруь я.
Уьмуьр ягъиз за датlана сафунай,
Михьи тварар жагъизва заз жизвияр.

Гагь шехьда зун, гагь хъукьвада, хъуьреда,
Кlанзни такlанз авахьда хьи накъвар зи.
Шехьзавач хьи зун крарихъ тежедай,
Кlанзава кун муьгьуьббатдин ракъар заз.

Зун шедайла Вун кlан жез мад кlевелай,
Мад уьмуьрдиз хразва за гиширар.
Ви тlвар даим атун патал мецелай,
Кхьизва за Ваз багъишна шиирар!