И намусни эдеб, камал зи хайи чил-Ватан я зи,
Адан дере, тепе, дуьзен хайи мугни макан я зи.

Дидедиз хуш куьрпе хьиз са зун гьуьрметдин къужахдава,
ГьакI тирвиляй яшайишдин мертебеяр кьакьан я зи.

Зи манияр шад хабар хьиз мугьман жезва физ рикIериз,
Вири чIалар дидед чIал хьиз хзандизни масан я зи.

Фейи югъ за рикIел хуьда, гьич садазни агъуздач кьил,
За хвена зи несил михьиз къени, пака, накьан я зи.

Яд чилерал алаз хьайи къизил-гимиш герек туш заз.
Зи хайи чил женнет я заз, ам зи сурни лакьан я зи.

Асеф Мегьман, вуна хайи накьвадиз ви гьуьрмет ая,
А накьвадал мичIивилер, валлагь, рикIиз дакIан я зи.

Асеф Мехман

ТIурфандин юкьваз аватайтIани,
Дагълара селдик акатайтIани,
МичIи тама рехъ алатайтIани,
Ажалдин вилик жедач зун ажуз,
Дидедив за кьил ийиз тач агъуз.

Кеферда варцар акъудайтIани,
Гьуьлуьн деринриз авудайтIани,
Са кIвач атIана галудайтIани,
Зайифардач за зи рикIин ялав,
Хкведа азиз дидедин къвалав.

Хкаж жеда зун дагъларин кукIвал,
Яд уьлквейризни акъатда яргъал,
Амма кьатI тийиз кIанивилин гъал,
Гьамиша рикIе жеда хайи хуьр,
Дидедин патав хкведа эхир.

Шах-Эмир Мурадов

Добавлено (02.01.2009, 14:16)
---------------------------------------------
ДИДЕДИН РИКI

Ажалдиз месе гьатнава диде,
Йифериз адал къаравул я хва.
Гьат тийидайвал гатун кар хъуьтIе,
Гьар са инсандиз герек я арха.

Дидедихъ амач гьич юзадай гьал,
Хва къайгъудар яз гва адан къвалав.
Са геренда хва фена ахварал,
Уях хъхьана кваз рикIик ялав.

Мягьтел хьана ам – вичин винелай
Аладарнавай акуна яргъан.
Азарлувални фена рикIелай,
Дидеди хциз кърбанзава чан.

Алачиз яргъан агаж хьанавай ам
Тадиз, аял хьиз, къжахламишна,
Нефесдив чими ийиз кIараб, хам,
Хци адаз рикIин ифин багъишна.

Шах-Эмир Мурадов