РикIин гафар
Дидедин нек са чIавузни ивидикай
хкатдай туш.
Рикьидалди кьегьал касдин рикIелай эл
алатдай туш.
Таладив дагъ, гатфарив зул, ракъинив
варз агатайтIан,
Азадвални зулум-зиллет мад са-садав
агатдайд туш.
Цавар цурцун, чилер ракьун, гьуьлер
азгъун хьайитIани,
Чпин Ватан кIандайбурук душмандин сас
акатдай туш.
Кьисмет хьана къакъатайтIан бедендивай
гъилер-кIвачер,
Зи эл диде Ватандивай, рикI чандивай
къакъатдай туш.
Зегьмет чIугна эгъуьналди хъуртан
кIаняй къизил-гимиш,
Кьеж галачир кьуру чиляй стIални яд
акъатдай туш.
Асул михьи къизил я чи рагъ хьиз экуь
яру пайдах.
Ам чи азад элдин гъиляй садран чилел
аватдайд туш.
Йифиз-йукъуз шиир кхьиз ацукьайтIан
а пайдахдик,
Вичел кIус чан аламай кьван Няметан гъил
галатдай туш.
Кц|ар
Кьуд пад тамар - дамар-дамар,
Серин кIамар, саки гамар.
Кьилихъ-кьилер рехи дагьлар,
Ценер-вири къацу багьлар,
Деред сиве цуьк я Кц|ар.
Сатин хьтин вили цава
Атирдин ни, секин гьава.
Шагьнабатдин ширин аваз
Йифиз-юкъуз япараваз,
Цуьквед сиве чиг я Кц|ар.
Мугьман кIани, ният къени
Мад гьа ихьтин шегьер женни ?!
Агьзур пата кIанид авай,
Къарабулах манидавай
Зи ван, зи чан, рикI я Кц|ар.
Жеда жал?
«Яраб, дустар, хуьруьн къене зун кьван викIегь кас жеда жал?
И мукьвара зун хуш тушир руш жеда жал, свас жеда жал?» -
Лугьудай са бикар чIавуз жуваз жув са дагъ хьиз акваз.
КIвалахдикай кичIедай заз лугьуз кьил, кьам кьас жеда жал.
Трактордив эгечIна зун рикI, мотор хьиз, зурзаз-зурзаз,
Фикирдаваз гъилерални, ракьарал хьиз, пас жеда жал?
Гила асул уьмуьрдин дад кьатIана за икI лугьузва:
Зегьмет такIан са инсандиз асул касвал хас жеда жал?
Шумуд йис я ракьун балкIан зав рахаз, зун рахаз адав,
Ажеб хъсан уьмуьр тушни? Бикарвилин мас жеда жал?
Бикардикай кас жеда жал?
| 
