 Меню | |
| Категории каталога | |
| Форма входа | |
| Жагъурун | |
|
| Дустар | |
|
| Чи силис | |
|
|
|
|
ЭФРУЗ РЕГЬИМОВА. "ЯРАН СУВАР" (4 пердедин пьеса) продолжение 1
ЭФРУЗ РЕГЬИМОВА. "ЯРАН СУВАР" (4 пердедин пьеса). Ləzgicə pyes
Ярал буба: - Ша, чан балаяр, квез чир хьун герек я, и къугъунар анжах вахт хъсанз алудун паталди ваъ, гьакI чирвилер артухарун паталди тешкилзавайди я. Къугъунрихъ чпин къайдаяр, гьакIни жазаяр ава. Къайдайрал амал тавурла, жазайриз таб гана кIанзава. Вирида хъсандиз яб акала. (Ада вичин къаридивай са дасмал къачузва) За жуван фикирда кьунвай къушракай са бязи гафар лугьуз – лугьуз и дасмалдив адан кьилин , кIвачерин ва маса чкайрин кIалубар къалурда ва «лув гуда гьа, лув гуда» лагьана и дасмал галтадда, ахпа квевай ам гьи къуш ятIа хабар кьада. Низ чир хьайитIа, дасмал гьадав вугуда. Адани квевай са маса къушран гьакъиндай хабар кьада. Низ а къуш чир тахьайтIа,
«Тапархъан», «Тапархъан» - лагьана, за бес я лугьудалди и дасмалдив ам гатада. Куьн вири гъавурда акьунани?
Вирида санал: - Акьуна, акьуна.
Ярал буба:
- Алаз вичел къармахар,
Вегьена кьаз маймахар.
Цавай къван хьиз къведа ам,
Къаяд кьилел жеда ам.
Цавун аршдай килигда,
Къивералди илигда.
Хурамди я квез чидай,
Гьи къуш я ам, дагъ хуьдай?
Лув гуда гьа, лув гуда.
Къушракай лагьана куьтягьайдалай кьулухъ дасмал гъилел арушна, гъил лув гузвай къушраз ухшарна инихъ – анихъ физва.
Ярал буба: - Фад лагь кван, лув гуда гьа, лув гуда.
Бубади лагьай дагъдин лекьрен лишанар садазни чир жезвач. Вирида кисна фикирдай чIавуз ХангуцI, КIватIи – кIватIаш, РемецI ва ХъилецI кIвализ гьахьзава, амма садани байихзавач. Бубади мад гъилера къушран лишанар тикрарайла ХангуцI лув гузвай дагъдин лекь хьиз тупIараллаз кьуьлиз – кьуьлиз бубад патав къвезва.
ХангуцI: - Дагъдин лекь я а къушран тIвар. Цавун аршда лув гуда, гъуьрч кьадайла къив гуда.
Вичини лекьре хьиз къив гана, йигин макьамдал илигзава. Тамай хтай гадайри (ХъилецIалай гъейри) ХангуцIахъ галаз кьуьлзава. ХъилецI пашман яз акур бубадихъ къалабулух акатзава.
Ярал буба: - ХангуцI, хийир хьуй, ХъилецIаз мад вуч хьанва?
ХангуцI: - Я буба, тамуз фидайла чна ихьтин са меслят авунай: за кIанчIар кIватIда, КIватIи – кIватIаша къелемар, РемецIа таран кул патал ципIихар, ХъилецIа кула хран патал шуьмягъдин тIвалар. РемецIаз акуна хьи, ХъилецIа вичин кIвалах тавуна, хъархъу таран хилер атIуз писпIияр расзава. РемецIа ам кIвалахиз мажбурна. Гьавиляй ХъилецIа хъелнава.
Ярал буба (сегьнедин вилик къвезва): - Агата кван, ХъилецI. (ХъилецI къвезва). РемецI, вунни ша кван. (РемецI атана ХъилецIан патав акъваззава.)
ХъилецI (РемецIаз килигна айгьамдив): - Кимидан кьил, буьркьуьдан вил вун тир.
Ярал буба: - Яран чIавуз хъел хьайи ксариз бубайри икI лугьудай:
- Я хъел хуьдай хъилен къуьн,
Хъсан кар туш хъилер хуьн.
Хъел хуьдайди сев жеди,
Адан бахтар кIев жеди.
(Вири хъуьрезва, бубади давамарзава.) Гьа, лагь кван гила, низ сев, низ пев жез кIан ятIа.
ХъилецI: - Заз сев жез кIандач.
Вири хъуьрезва.
РемецI: - Зазни жез кIандач.
Вири мадни гурлуз хъуьрезва.
Ярал буба: - Квекай садазни сев жез кIанзавачтIа, гъил – гъилиз, къуьн – къуьнуьз яна, дуст хьухь. Гьич рикIелай алудмир, Яран сувариз хъел хьун гунагь я. Хъелнавайбур вири дуст жер кьван я. Гьа кван садра (Абурув гъил – гъиле кьаз тазва).
Вирида капар ягъизва.
Ярал буба: - Гъваш кван гила ХъилецIа атIанвай хъархъу тIвалар. (Гъизва). Иниз ша, ХъилецI, вуна писпIияр раса, зани балабан расда. Амма писпIи расдайла икI лагь: «Яд хкат, кьур хкат. Зи писпIидик ван акат, зи писпIидик ван кутур, ламран кIвачик къван кутур.»
Рушар (санал мани лугьузва):
- ПиспIидал ван алаз хьуй,
Зуьрне – далдам галаз хьуй.
Макьам ягъизвай гада,
Вазни рушар акваз хьуй.
Жагъура са тават на,
Жуван вили кьадайвал.
Фад ракъура илчияр,
Яран мехъер жедайвал.
Сегьнедин кьулухъай зуьрнейрин ван къвезва. Рушари мани лугьуз – лугьуз кьуьлзава. Перде кIев жезва.
2 - ПЕРДЕ
югъ
Сад лагьай пердеда авай лезги кIвал. КIвалин юкьвал суварин суфра безетмишнава. Яру суфрадал са кIунчI цуькверни ала. Яру пекерни яру бишме алай Ярбике хвешиз – хвешиз кIвализ гьахьзава.
Ярбике: - Рушар, рушар, я рушар, Яран югъ алукьнава. Килиг, гьикьван гуьлуьшан югъ ятIа. (Рушарин ван акъатзавач. Ярбикеди мад гъилера абуруз эверзава.) Рушар, рушар, куьн гьинава?
Садлагьана дамахарнавай рушар кIвализ гьахьзава.
Рушар:
- Чун инава, Ярбике,
Иер бике, Зарбике.
ЧидатIа ваз гунияр,
Лагь, на, Яраз манияр!
Ярбикеди наздив рушариз килигзава. Ахпа ада Яраз манияр лугьудай адетдик кьил кутазва.
Ярбике:
- Яр атурай - сувар гвай,
Силин тIямни савар гвай.
Яр атурай – мехъер гвай,
Рагаларни мелер гвай.
Рушари гьарада са мани лугьузва.
Аярханум:
- Яран рехъ кьве икIи я,
Алкьвар, Талкьвар куьруь я.
Элхен, Гелхен – тIимил къар,
УрукIун, ТIурукIун кIурукIар.
Перизада:
- Яран сувар – багьади,
Ракъар гъизвай захади.
Вун атурай, рагъ атуй,
Мелердайвал бахади.
Селминаз:
- Яран сувар алукьна,
Кьуьд яргъара амукьна.
Руш къачуна кьуьзека,
Чун пагь атIуз амукьна.
Эхиримжи кьве цIар лугьудайла Селминаза тупIув Шагьнабат къалурзава. Вири хъуьрезва.
Туькезбан:
- Сувар кIани эл хьурай,
Суьруь ацIай чуьл хьурай.
Уях жервал дагъ, дере,
Яран ракъар бул хьурай.
Шагьнабат:
- Яран уьмуьр яргъи хьуй,
Чи бицIекар чIехи хьуй.
Мехъер ая, жегьилар,
Эл – убадиз хвеши хьуй.
Беневша:
- Къадир хьухь гьар каламдин,
Гаф лугьумир айгьамдин.
Ван атурай зуьрнейрин,
Свас тухудай макьамдин.
Беневшади мани тамамарайла, къецикай зуьрнейрин ванер къвезва. Рушар чукурна кIваляй экъечIзава. Ярбике амукьзава. Бубадини бадеди къужахдаваз гъайи кIарасар къулан патав тазва.
Ярал буба:
- Ислягьвал хьуй и дуьньяда,
Чавай яргъаз гьар са къада.
Къаяр гвай кьуьд акъатна мад,
Аваз хьуй чун рикIер яз шад.
Пудани санал: - Амин!
Бубади къула цIайзава. Бадеди къажгъандиз нек куьзна, къулал эцигзава. Ярбикеди самавар михьна, калтадна, кварце авай яд адаз цвана, чайдин гьазурвилер аквазва.
Ярбиче баде:
- Чи зегьметар зае тахьуй,
Чи душманар регьимлу хьуй.
Чиляй чIур хьиз, цавай марф хьиз,
Чаз гъуцари берекат гуй.
Пудани санал: - Амин!
Ярбике (Тара авай зуракI сумагдилай кап элягъиз ):
- РикIе аваз хъсан ният,
Чирин чна халкьдин сенят.
Бадед кьилив вири кIватI жен,
Квахь тавурай элдин адет.
Пудани санал: - Амин!
Ярбике: - Я баде, вуна садра чаз лагьанай хьи, инлай вилик Яран береда мелер пара жедай. Яран гамар храдай мелер иллаки гурлудаказ кьиле фидай. А мелерикай лагь ман, чан баде.
Ярбиче баде: - За ваз вуч лугьун, чан бадедин. Инлай вилик Яран гамар хран патал рушарни сусар санал кIватI жедай. КIвенкIве гьар гамунихъ рехи дишегьли ацукьдай. Сифте квакварни гьабуру вегьедай. Ахпа сусарини рушари рехи дишегьлийрин гъилиз темен гана, абур чкадилай къарагъардай ва гамунихъ чеб ацукьдай. Яшлубур Яран суварив эгечIдай. Зуьрнечийри халкьдин макьамрал илигдай.
Яран чIавуз анжах Яран чешнеяр храдай. Месела: «Ярар», «Яру тав», «Яран цуьк», «Яру фур», «Сафар», «Мукзар» ва масабур. Гам храдай рушари кIвалахиз – кIвалахиз Яракай манияр лугьудай.
Ярбике: - Гьихьтин манияр, чан баде?
Ярбиче баде: Ваз вири са юкъуз чириз кIанзавай хьтинди я, чан руш. Яран манияр лугьуз тежедай кьван хъсанбур тир:
- «Яру фур»ун яр аваз,
ТIвар эцига тарамаз.
Руш чидач мус гудатIа,
И Яран гам Ярамаз.
Гамар ршаз тара хьуй,
Хуьуруьн рушар пара хьуй.
Зи вили кьур таватар,
Къвер яралди кIура хьуй.
Бадеди манияр лугьудайла, Яран паяривни куькIуьрнавай шамарив безетмишнавай хунчаяр гвай руш аялар кьуьлиз – кьуьлиз кIвализ гьахьзава. КIвале авайбуруни гьабурухъ галаз кьуьлзава. Ахпа вирида са – садаз суварар мубаракзава. Кьуьл кьилиз акъатайла, бубадини бадеди аялриз алхишар ийизва.
Ярал буба:
- Варз хьиз цIийи хьуй,
ЦIицI хьиз дири хьуй,
ЦIай хьиз хуьци хьуй!
Ярбиче баде:
- Гъуцари хуьрай,
Акьул гурай,
Хара хьурай!
Ярал буба:
- Рагъ чими хьуй,
Дагъ хьиз вини хьуй,
Гафунал кIеви хьуй!
Ярбиче баде:
- Гара хьурай,
Пара хьурай,
Бахтлу хьурай!
Вирида санал:
- Бахтлу хьурай!
Бахтлу хьурай!
Рушари суфрадал недай затIар эцигзава. Аярханума вичин гъиле авай гатфарин цуькверикай ни чIугвазва. Рушари суфрадал вири няметар эцигайдалай кьулухъ абур бубадихъ элкъвезва.
Перизада: - Я буба, килига кван, вуч кими ятIа.
Ярал буба: - Чан хтулар, Гъуцари куь чан сагъ авурай, куьн бахтлу хьурай. Заз чиз суфрадал вири няметар ала. ЧIахарин аш, гитI, калар, сав, семена, тIач, танурдин фу, тIунутIар, иситIа, гьажикIадин чIатI, паквар, къвакъвар, кIерецар, шуьмягъар, какаяр, мадни вуч кIанда кьван? Аллагьди вичи берекат кутурай.
Селминаз: - Чан буба, ирид афарни, ирид цикIен чна къевиз чрада.
Ярал буба: - Баркаллагь, чан руш Гъуцари квез нуьсрет гурай.
Туькезбан: - Буба чан, Яран сувариз къавурмаяр, шурваяр вучиз чрадач?
Ярал буба: - Дегь заманайрилай амай адетрикай са чIавузни ягьанат мийир. А адетрив фагьумлудаказ эгечIа. Чи чIехи бубайрихъни дидейрихъ гзаф чирвилер авай
Ярбиче баде: - ХъуьтIяй акъатай инсандиз гужлу тIуьн лазим я. И няметар – тIач, семена, калар, сав… ибур вири инсандиз къуват гузвай няметар я. Илимдини и кар субутнава. Мад са месэла рикIел хуьх, чан хтулар, суфрадал кудай, туькьуьл, уьцIуь ва цуру къафунар эцигна кIанзавач.
ХангуцIа, ПIаша ва Куга виридаз суварар мубаракзава.. Бадеди хизан суфрадихъ ацукьарна, яран тIуьнрикай дадмишиз гузва. Ахпа ХангуцI, ПIаш ва Куг къарагъна, мукьва – кьилийриз суварар мубаракиз физва. Бадеди Ярбикедив паяр вугана къуншидиз ракъурзава.
Ярбиче баде (рушариз): - Эгь, чан балаяр, Яран бере гьа виликан хьиз иер я. Анжах и суварин са бязи адетар чна рикIелай алудзава. Амма хъсан адетар гьамиша хвена кIан я.
Селминаз: - А адетар гьихьтинбур тир, чан баде?
Ярбиче баде: - Инлай вилик мискIалар лугьудайбурун гьуьжетунар кьиле фидай. Вуж уфтан хьайитIа, адаз кьилди Яран паяр гудай. МискIалар инсандикай, кIваликай, майишатдикай жедай. Месела:
Имуча – муча,
Муч халича.
Дагъдин кукIвал
Къизил хунча?
Имуча – муча, са тар, тарцел 12 хел, гьар са хилел 30 пеш, гьар пешинин са пад чIулав, са пад лацу.
Пуд стхади кIватIиз, са стхади пучиз.
Шагьнабат: - Чан баде, чна жавабар гун ман.
Ярбиче баде: - Ихьтин чIавуз гьикI лугьудатIа чидани квез?
Рушар: - ГьикI лугьуда?
Ярбиче баде: - ИкI лугьуда. Жузунриз жаваб гайидан кIвале рагъ, жаваб тагайдан кIвале чIагъ хьурай.
Рушар (хъуьрезва): - Чан баде, чаз чи кIвалера рагъ хьана кIан я эхир.
Ярбиче баде: - АкI ятIа, жаваб це.
Туькезбан: - Лагь ман, чан баде, чна жавабар жагъурин.
Ярбиче баде: - Цик акъатна кьежин тийидайди, чархалай аватна рекьин тийидайди.
Беневша: - Хъен.
Ярбиче баде: - Аферин.
Аярханум: - Мадни лагь ман, чан баде.
Ярбиче баде: - Имуча-муча,
Муч халича.
Къене тар,
Винел ратар,
Вуч я?
Садазни чир жезвач. Бадеди пагьливанди хьиз гъилер эчIез яна, кIвалелай цIар ягъизва. Ван акъат тийиз акур ада мад са мискIал лугьузва.
Ярбиче баде:
- Имуча-муча,
Муч халича,
Вич куьруь,
Тум яргъи,
Инсандал абур гъири
Вуч я?
Мадни рушаривай жаваб вугуз жезвач. Вири кисна акъвазнава. Перизада бадедив агатзава.
Перизада: - Баде, чавай жузунриз жаваб гуз хьанач. Гила чи кIвалера чIагъ жедани?
И гафар ван хьайила вири хъуьрезва. Бадеди рушан киферилай кап аладарзава.
Ярбиче баде: - Чан хтулар, эгер за куь тахсирдилай гъил къачуна кIанзаватIа, гьарада Яракай са мисал лагь. Квез чир тахай сад лагьай мискIалдин жаваб «гъал алай тупучI», муькьуьди «раб» я.
Рушар фикир-фагьум авуна, мисалар лугьуз алахъзава.
Аярханум: - Ярал акьалтай цегь рекьидач.
Перизада: - Яран са югъ хъуьтIуьн са вацралай хъсан я.
Селминаз: - Яран ярашух цуьквер, зулун ярашух бегьер я.
Туькезбан: - Зулухъай кичIе хьухь, вилик пад кьуьд я, хъуьтIуькай кичIе жемир адахъ яр гала.
Шагьнабат: - Яран са кьил яйлах, са кьил булах я.
Беневша: - Яран дуст яргъал фида.
Рушар ара датIана мисалар лугьуз алахъзава.
Аярханум: - Са цуьк экъечIналди Яр алукьдач.
Перизада: - Яр атана Ярам атанач.
Селминаз: - (Перизададихъ элкъвена): - Ваз авайди Яраман дерт я. Ярам фена Маскавдиз, четин хкведи.
Рушар хъуьрезва. Бадеди Перизададиз рикI-дуркIун ийизва.
Ярбиче баде: - Ярамни хкведайди я, Яралини. (Вири хъуьрезва). Садни рикIелай ракъурмир. Чахъ ихьтин мисални ава: Яр атана, яр хтана.
Рушар кап – капуз ягъиз хъхуьрезва. ХъуьчIуьк паяр кваз рикIинихъ акъвазна бадедихъ яб акалзавай Магьрузар эме вилик къвезва.
Магьрузар эме: - Гьалал хьуй ваз, Ярбиче. Ви кьейибуруз Аллагьди рагьмет авурай. И суварин юкъуз вуна зи рикIе авай цаз акъудна. (Виридаз темен гуз суварар мубаракзава.) Жаванриз ихьтин акьулар гузвай ви а мециз кьий. Я кIвал къени хьайидан руш, чна и адетар хвена, жегьилриз чир тавуртIа, суварин юкъузни мукьва кьилийри сад – садан рак ахъайич. (Рушариз килигзава.) Куьне куь мукьва – кьилийриз суварар мубарак авунани?
Шагьнабат (эмедиз чай цана эцигзава): - Чун гила фида. Сифте инал атанвайди я.
Ярбиче баде: - Я Магьрузар, ажеб хъсан хьана вун атана. И рушариз Яран суварин куьгьне адетрикай са кьве ихтилат ая.
Рушар адан кьилив кIватI жезва.
Магьрузар эме: - Чан хтулар, чун гъвечIи тир чIавуз бадейрихъ гилан сандухрилай гъейри тIвалерикай храна сувагъ ганвай, канду лугьудай чIехи къапарни жедай. Абуруз къуьл, гъуьр, кIерецар, пахлаяр ва маса недай затIар ичIирна, кьилни кIевна, хъуьтIуьн тадаракар ийидай. Агъадай са тIвек авуна, ана кIарасдин кIумпI кутадай. Лазим тир ризкьи гьа кIумп акъудна къачудай. Гад кIватIна куьтягьайла, гьар са няметдикай кьилди кандуда кутуна Яран сувар патални ризкьи хуьдай. Ам анжах Яраз ахъайдай. Гилан инсанри ихьтин тадаракар ийизвач. Къенинди къе, пакагьанди Аллагьдин ризкьи…
Ярбиче баде: - Вучиз лагьайтIа, чан вах, гила – базар туьквенра гьар са затI ава. Пул хьайила кандудин кьил ахъаяй гьисаб я.
Магьрузар эме: - Ам гьакI я, амма сандухар ва кандуярни аваз хьурай. Жуван сандухдин шейерикай гъанва за квез. (Бадедизни рушариз вичи жаван чIавуз цванвай ва хранвай затIар багъишзава).
Беневша: - Я чан эме, гунияр гьикI теснифдатIа рахух ман.
Магьрузар эме: - Хуьруьнвийри Яран вахтунда цанар цана, тумар вегьена, багълара кIвалахна кIанда хьи, хъсан бегьер къачудайвал. Ара датIана марфар къвайила им мумкин туш. Гьавиляй рагъ экъечIрай, марф атIурай лугьуз рушари цIамарикай нинияр (гунияр) расна, абурал яру пекер алукIарна хуьр тирвал гваз къекъведай. Гуни гвай руш рахадачир. Гьар са кIваляй паяр гудай. Недай затIар пара гана кIанзавай хьи, гунидиз хвеши хьурай. Пара паяр гана адаз хвеши авуртIа, Рагъ экъечIда лугьудай. А чIавуз инсанар ихьтин краринни адетрин чIалахъ тир.
Гунидин гевил шадарун патал рушари икI лугьудай:
А Гуни – Гуни хьун герек,
Гунидиз рагъ гун герек.
Цава авай чIулав пехъ
Ракъин нурди кун герек.
А Гуни – Гуни кIан хьурай,
Атараз чи ван хьурай.
Чаз ракъар бул гудайвал,
Чна никIер гуьдайвал.
Ярал буба (гьевесдив яб гайидалай гуьгъуьниз): - Я хва сагъ хьайиди, вуна лап зи аял чIавар рикIел хкана хьи…
Аярханум: - Чан буба, рахух кван а чIаварикай.
Ярал буба (хиялриз физва): - Чими ракъар пара хьайилани цанвай тумар кьуру жеда, абуру четин цIирда, акъатдач. А чIавуз марфар къурун патал чун са кIеретI гадаяр тамуз фидай. Къацу пешер алай таран хилер атIана, са – садал кутIунна са цицIи гада аялдин кьилел гьалддай. Ахпа ам хуьр тирвал къекъуьрна чIимелвилин гъуц Гудулаз паяр кIватIдай. Хуьре къекъвезвай аялри икI лугьудай:
А Пешапай, Пешапай.
Пешапайдиз марф кIанда.
Имир, имир, имир марф,
Тефей чка тамир марф.
Марф къуьлериз,
Къуьл кIатIариз,
Амин минариз,
Кьабул хьурай Гъуцариз!..
Гьар мягьледиз гьахьайла кIеретI мадни къалин жедай. Хуьре къекъвена куьтягьайдалай кьулухъ кIватIай паярни гваз чун пIирел фидай. ЧIимелвилин гъуцдиз дуьаяр ийиз, паяр недай, амай затIар гадайрин арада пайна кIвализ хкидай.
Шавхабег ими къвезва. Суварар мубаракна, хъуьчIуькай са вуч ятIани хкудна Ярбикедив вугузва. Рушар вири Ярбикедал алтIуш жезва.
Ярбиче: -Чан ими, им вуч затI я?
Шавхабег: - Сурат эмеди сурарал гузанар пайзавай, за жуван пай квез гъана.
Рушари гузандикай дадмишзава.
Перизада: - Чан баде, лагь ман им гьикI чразвайди ятIа.
Ярбиче баде: - Я рикIиз кьейи балаяр, Яран сувариз гьазурзавай затIар лагьана куьтягь жедай кьванбур туш. ЧIемедал тини ишинна фу чразва. Ам къайи хьайила са къапуна дуьдгъвер, кака ва шекер акадарна, тIурунив фан винел алтадзава. Жезва гузан. Cуварин юкъуз за жува квез ам чрада.
Бадеди суфрадик суварин паяр кутуна Туькезбанав вугузва.
Ярбиче баде: - Чан хтулар, за и суварин няметар гьазурдайла кьейибур рикIел хкана, абурун руьгьериз дуьа авунвайди я. И паярни Туькезбана чи патай сурарал атанвайбуруз пайда. Чи кьейибурун руьгьер къуй шад хьурай. АкI хьайила чи кIвални берекатлу жеда.
Рушар: - Гъуцари кьабулдай игьсан хьурай.
Ярал бубади, Ярбиче бадеди, Магьрузар эмеди ихтилатрал илигзава. ХъилецIани РемецIа абуруз суварар мубаракзава. Фу тIуьрдалай кьулухъ Шавхабег имиди абурув какаяр элуькьариз тазва. Ада и къугъунин къайдаяр гъавурда твазва. Жегьилри къугъуник кьил кутазва ва кIвенкIве гьарда вичин шартIар лугьузва.
ХъилецI (пагьливандин саягъда къекъвез - къекъвез):
- Зав гвай кака яруди,
Ханвай верч я харуди.
Уфтан хьайтIа и кака,
ЦIуд мад хкваш на мукай.
РемецI (адани ХъилецIа хьиз, къекъвез – къекъвез):
- Дамахмир на какадив,
Хаз жеч зиди кутIадив.
Уфтан хьайтIа и кака,
На гъида заз шакIукIа.
Чпин шартIар лагьайдалай гуьгъуьниз абуру гъуцариз разивал къалурзава.
ХъилецI: - Алпан, Атар, Яр, Тавар,
Гайибур чаз и сувар.
Хуш яз къе куь чIал, мани,
ЛукIар я чун, куьн кIани.
РемецI: - ЧIехи гъуцар, чIехибур,
Чун гъуцарлай разибур.
Къалура чаз бахтлу къар,
Агудмир чав асибур.
Гъуцариз разивал къалурна куьтягьайла, гадаяр кIек хьиз сад – са
| | Категория: Пьесы | Добавил: lezgiland (17.12.2008)
| | Просмотров: 2474
| Рейтинг: 0.0/0 |
|
|
|
